shohrat-e-tarz-e-fuġhāñ aam huī jaatī hai
koshish-e-zabt bhī nākām huī jaatī hai
mast haiñ aur talab-e-jām huī jaatī hai
be-ḳhudī hosh kā paiġhām huī jaatī hai
muskurātā hai hasīñ parda-e-gulshan meñ koī
aur kalī muft meñ badnām huī jaatī hai
qaid meñ bhī hai asīroñ kā vahī josh-e-amal
mashq-e-parvāz tah-e-dām huī jaatī hai
toḌ kar dil nigah-e-mast na pher ai saaqī
bazm kī bazm hī be-jām huī jaatī hai
lab jo khole to gulistāñ meñ kalī kaun kahe
chup bhī rahtī hai to badnām huī jaatī hai
mujh ko le jā.egī manzil pe mirī sub.h-e-yaqīñ
laakh raste meñ mujhe shaam huī jaatī hai
nāvak-andāzī-e-jānāñ kā asar hai ki 'figār'
ek duniyā mirī hamnām huī jaatī hai
shohrat-e-tarz-e-fughan aam hui jati hai
koshish-e-zabt bhi nakaam hui jati hai
mast hain aur talab-e-jam hui jati hai
be-KHudi hosh ka paigham hui jati hai
muskuraata hai hasin parda-e-gulshan mein koi
aur kali muft mein badnam hui jati hai
qaid mein bhi hai asiron ka wahi josh-e-amal
mashq-e-parwaz tah-e-dam hui jati hai
toD kar dil nigah-e-mast na pher ai saqi
bazm ki bazm hi be-jam hui jati hai
lab jo khole to gulistan mein kali kaun kahe
chup bhi rahti hai to badnam hui jati hai
mujh ko le jaegi manzil pe meri subh-e-yaqin
lakh raste mein mujhe sham hui jati hai
nawak-andazi-e-jaanan ka asar hai ki 'figar'
ek duniya meri hamnam hui jati hai
Source:
Harf-o-nava (Pg. 107)
-
Author:
umesh bahadur sirivasto figaar unnavi
-
- Edition: 2001
- Publisher: Figaar Unnavi
- Year of Publication: 2001
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.