shoKHi machal machal kar mastana kah rahi hai

shoḳhī machal machal kar mastāna kah rahī hai

dīvāngī-e-vahshat dīvāna kah rahī hai

ik sham.a jal rahī hai mere harīm-e-dil meñ

jo soz-e-be-ḳhudī kā afsāna kah rahī hai

har rang meñ numāyāñ har rang se barī ho

merī nazar se pūchho kyā kyā na kah rahī hai

nargis kī aañkh meñ hai mai-kash kā raaz pinhāñ

jis ko nigāh terī paimāna kah rahī hai

sarmast chashm-e-sāqī maḳhmūr chashm-e-sāqī

mai-ḳhāna-e-azal kā afsāna kah rahī hai

lo dekh lo vo aa.e bāda-ba-jām aa.e

ḳhush-āmdīd ḳhāk-e-mai-ḳhāna kah rahī hai

saaqī kī hai duhā.ī saaqī kī hai duhā.ī

tishna zabān-e-mai-kash mastāna kah rahī hai

is nā-murād dil ne logoñ kā kyā bigāḌā

kam-baḳht ko jo duniyā dīvāna kah rahī hai

jis ne 'fazā' ke dil ko maḳhmūr kar diyā hai

us kā fazā-e-ālam afsāna kah rahī hai

shoKHi machal machal kar mastana kah rahi hai

diwangi-e-wahshat diwana kah rahi hai

ek shama jal rahi hai mere harim-e-dil mein

jo soz-e-be-KHudi ka afsana kah rahi hai

har rang mein numayan har rang se bari ho

meri nazar se puchho kya kya na kah rahi hai

nargis ki aankh mein hai mai-kash ka raaz pinhan

jis ko nigah teri paimana kah rahi hai

sarmast chashm-e-saqi maKHmur chashm-e-saqi

mai-KHana-e-azal ka afsana kah rahi hai

lo dekh lo wo aae baada-ba-jam aae

KHush-amdid KHak-e-mai-KHana kah rahi hai

saqi ki hai duhai saqi ki hai duhai

tishna zaban-e-mai-kash mastana kah rahi hai

is na-murad dil ne logon ka kya bigaDa

kam-baKHt ko jo duniya diwana kah rahi hai

jis ne 'faza' ke dil ko maKHmur kar diya hai

us ka faza-e-alam afsana kah rahi hai