shor-angez wo KHun-bar hawa bhi aae

shor-angez vo ḳhūñ-bār havā bhī aa.e

aur dabe paañv kabhī bād-e-sabā bhī aa.e

zalzale ne jise mismār kiyā thā yaaro

log nafrat kī vo dīvār uThā bhī aa.e

jaane ḳhvābīda ki bedār hai munsif kā zamīr

ham to insāf kī zanjīr hilā bhī aa.e

mere afkār haiñ har chand vafā ke pāband

kuchh ḳhayālāt magar tere sivā bhī aa.e

terī ḳhātir na kabhī maiñ ne palaT ke dekhā

raah meñ ġharche ka.ī koh-e-nidā bhī aa.e

log ho sakte nahīñ ḳhvāb-e-girāñ se bedār

ab jagāne ke liye chāhe ḳhudā bhī aa.e

shor-angez wo KHun-bar hawa bhi aae

aur dabe panw kabhi baad-e-saba bhi aae

zalzale ne jise mismar kiya tha yaro

log nafrat ki wo diwar uTha bhi aae

jaane KHwabida ki bedar hai munsif ka zamir

hum to insaf ki zanjir hila bhi aae

mere afkar hain har chand wafa ke paband

kuchh KHayalat magar tere siwa bhi aae

teri KHatir na kabhi main ne palaT ke dekha

rah mein gharche kai koh-e-nida bhi aae

log ho sakte nahin KHwab-e-giran se bedar

ab jagane ke liye chahe KHuda bhi aae