shor kaisa hai mubtala mujh mein

shor kaisā hai mubtalā mujh meñ

kaun rahtā hai dūsrā mujh meñ

maiñ kisī jabr ke hisār meñ huuñ

ik safar hai rukā huā mujh meñ

jaane kyā thā ki raat us kā ḳhayāl

rāsta DhūñDhtā rahā mujh meñ

TimTimāte rahe galī ke charāġh

raqs kartī rahī havā mujh meñ

kab se apnī talāsh hai mujh ko

tū ne kyā kyā chhupā diyā mujh meñ

kitnā sarsabz ho gayā huuñ maiñ

kaun sā zaḳhm thā harā mujh meñ

is qadar ġhaur se na dekh mujhe

aks paḌtā hai chāñd kā mujh meñ

'qais' vo shaḳhs aam sā thā magar

kitne manzar sajā gayā mujh meñ

shor kaisa hai mubtala mujh mein

kaun rahta hai dusra mujh mein

main kisi jabr ke hisar mein hun

ek safar hai ruka hua mujh mein

jaane kya tha ki raat us ka KHayal

rasta DhunDhta raha mujh mein

TimTimate rahe gali ke charagh

raqs karti rahi hawa mujh mein

kab se apni talash hai mujh ko

tu ne kya kya chhupa diya mujh mein

kitna sarsabz ho gaya hun main

kaun sa zaKHm tha hara mujh mein

is qadar ghaur se na dekh mujhe

aks paDta hai chand ka mujh mein

'qais' wo shaKHs aam sa tha magar

kitne manzar saja gaya mujh mein