shu’ur-e-fikr hona ya ki idrak-e-suKHan hona

shu’ūr-e-fikr honā yā ki idrāk-e-suḳhan honā

'atā-e-ḳhās-e-qudrat hai kisī kā ahl-e-fan honā

muqaddar ban ga.iiñ tārīkiyāñ shām-e-ġharībāñ kī

qayāmat thā mirā rad-karda-e-sub.h-e-vatan honā

ġhubār-e-kam-nigāhī meñ nazar kyā ḳhaak aa.egā

mire ḳhūn-e-gulū kā ġhāza-e-husn-e-chaman honā

jahāñ bārish ho aañsū kī shab-e-ġham ke añdhere meñ

ġhanīmat hai kisī lab pe tabassum kī kiran honā

abhī khilne hī paayā thā ki toḌā dast-e-gul-chīñ ne

na raas aaya chaman meñ phuul ko rang-e-chaman honā

vahī mānūs galiyāñ ajnabī mā'lūm hotī haiñ

musībat hai kisī kā bhī vatan meñ be-vatan honā

bisāt-e-soz-e-ġham pe qismateñ donoñ kī yaksāñ haiñ

par-e-parvāna honā yā charāġh-e-anjuman honā

sañvārā karte haiñ 'bahzād' bhī zulf-e-suḳhan lekin

mayassar kab huā minjumla-e-arbāb-e-fan honā

shu’ur-e-fikr hona ya ki idrak-e-suKHan hona

'ata-e-KHas-e-qudrat hai kisi ka ahl-e-fan hona

muqaddar ban gain tarikiyan sham-e-ghariban ki

qayamat tha mera rad-karda-e-subh-e-watan hona

ghubar-e-kam-nigahi mein nazar kya KHak aaega

mere KHun-e-gulu ka ghaza-e-husn-e-chaman hona

jahan barish ho aansu ki shab-e-gham ke andhere mein

ghanimat hai kisi lab pe tabassum ki kiran hona

abhi khilne hi paya tha ki toDa dast-e-gul-chin ne

na ras aaya chaman mein phul ko rang-e-chaman hona

wahi manus galiyan ajnabi ma'lum hoti hain

musibat hai kisi ka bhi watan mein be-watan hona

bisat-e-soz-e-gham pe qismaten donon ki yaksan hain

par-e-parwana hona ya charagh-e-anjuman hona

sanwara karte hain 'bahzad' bhi zulf-e-suKHan lekin

mayassar kab hua minjumla-e-arbab-e-fan hona