shukr ko shikwa-e-jafa samjhe

shukr ko shikva-e-jafā samjhe

kyā kahā maiñ ne aap kyā samjhe

ham tirī baat nāsehā samjhe

koī samjhe hue ko kyā samjhe

marazul-maut ko shifā samjhe

dard ko jaan kī davā samjhe

is taḌapne kā mudda.ā samjhe

dil-e-bad-ḳhū tujhe ḳhudā samjhe

haa.e nādānī-e-sarishk na pūchh

girya ko tarz-e-iltijā samjhe

kar diye ik jahāñ ke but ḳhud-bīñ

ai sikandar tujhe ḳhudā samjhe

dard-angez suur kī āvāz

dil shikastan kī ham sadā samjhe

aur bigḌe mirī shikāyat se

kuchh bhī mauqa na baat kā samjhe

shikva-e-jaur par uThā.ī teġh

vo mujhe jaan se ḳhafā samjhe

kaun kartā hai aane kā va.ada

ham tirī bandisheñ hinā samjhe

haif nādānī-o-taġhāful-e-dil

kyā tujhe aap se ḳhudā samjhe

ġhair bheje hai us ko ḳhatt-e-visāl

kaash merā likhā huā samjhe

ruuh ke saiñkaḌoñ libās hue

kis ko utrī huī qabā samjhe

dil kī nākāmiyoñ se jaan ga.ī

kis nikamme ko kaam kā samjhe

'sho.ala' kal hī to mai-kade meñ the

aaj tum kis ko pārsā samjhe

shukr ko shikwa-e-jafa samjhe

kya kaha main ne aap kya samjhe

hum teri baat naseha samjhe

koi samjhe hue ko kya samjhe

marazul-maut ko shifa samjhe

dard ko jaan ki dawa samjhe

is taDapne ka muddaa samjhe

dil-e-bad-KHu tujhe KHuda samjhe

hae nadani-e-sarishk na puchh

girya ko tarz-e-iltija samjhe

kar diye ek jahan ke but KHud-bin

ai sikandar tujhe KHuda samjhe

dard-angez sur ki aawaz

dil shikastan ki hum sada samjhe

aur bigDe meri shikayat se

kuchh bhi mauqa na baat ka samjhe

shikwa-e-jaur par uThai tegh

wo mujhe jaan se KHafa samjhe

kaun karta hai aane ka wada

hum teri bandishen hina samjhe

haif nadani-o-taghaful-e-dil

kya tujhe aap se KHuda samjhe

ghair bheje hai us ko KHatt-e-visal

kash mera likha hua samjhe

ruh ke sainkaDon libas hue

kis ko utri hui qaba samjhe

dil ki nakaamiyon se jaan gai

kis nikamme ko kaam ka samjhe

'shoala' kal hi to mai-kade mein the

aaj tum kis ko parsa samjhe