shurua hone ka matlab hi iKHtitam na ho

shurūa hone kā matlab hī iḳhtitām na ho

mirī shikast kahīñ tujh se intiqām na ho

shanāḳht sab se baḌā nafsiyātī mas.ala hai

maiñ chāhtā huuñ kisī shai kā koī naam na ho

anā ziyāda zarūrī hai saañs kī nisbat

sipāhī martā hai mar jaa.e par ġhulām na ho

mujhe to dil ne ajab vasvasoñ meñ Daal diyā

shikast-o-reḳht kisī tarz kā kalām na ho

abhī talak vo mirī aañkh se nahīñ niklā

na.e shikārī kī jangal meñ pahlī shaam na ho

hamesha Thahrī huī shai nishāna bantī hai

ḳhayāl rakhnā ki rah meñ kahīñ qiyām na ho

sag-e-zamāna salīqe se aarī hai 'hamza'

suḳhan-varī kisī darvesh kā hī kaam na ho

shurua hone ka matlab hi iKHtitam na ho

meri shikast kahin tujh se intiqam na ho

shanaKHt sab se baDa nafsiyati masala hai

main chahta hun kisi shai ka koi nam na ho

ana ziyaada zaruri hai sans ki nisbat

sipahi marta hai mar jae par ghulam na ho

mujhe to dil ne ajab waswason mein Dal diya

shikast-o-reKHt kisi tarz ka kalam na ho

abhi talak wo meri aankh se nahin nikla

nae shikari ki jangal mein pahli sham na ho

hamesha Thahri hui shai nishana banti hai

KHayal rakhna ki rah mein kahin qiyam na ho

sag-e-zamana saliqe se aari hai 'hamza'

suKHan-wari kisi darwesh ka hi kaam na ho