shuur-e-fitrat-e-insan ka hai bedar ho jaana

shu.ūr-e-fitrat-e-insāñ kā hai bedār ho jaanā

kahīñ majbūr ban jaanā kahīñ muḳhtār ho jaanā

dikhā kar ik jhalak us kā pas-e-dīvār ho jaanā

yahī to āshiqoñ ke haq meñ hai talvār ho jaanā

mire so.e hue jazbāt kā bedār ho jaanā

kisī behosh kā hai ḳhud-baḳhud hushyār ho jaanā

karūñ maiñ ḳhuun kā da.avā to pesh-e-dāvar-e-mahshar

qayāmat hai magar qātil se āñkheñ chaar ho jaanā

shikast-e-be-sutūn-o-mauj-e-jū-e-shīr shāhid haiñ

nahīñ āsān rāh-e-ishq kā hamvār ho jaanā

sharaf hai ye faqat ik ashraf-ul-maḳhlūq insāñ kā

fazā-e-ālam-e-imkāñ kī had se paar ho jaanā

ba-qaul-e-'mīr' ye insān par tohmat-tarāshī hai

kisī majbūr kā mumkin nahīñ muḳhtār ho jaanā

yuuñ hī yād-e-ḳhudā aa jaatī hai mujh ko kabhī 'sho.ala'

ki jaise sote sote ḳhvāb se bedār ho jaanā

shuur-e-fitrat-e-insan ka hai bedar ho jaana

kahin majbur ban jaana kahin muKHtar ho jaana

dikha kar ek jhalak us ka pas-e-diwar ho jaana

yahi to aashiqon ke haq mein hai talwar ho jaana

mere soe hue jazbaat ka bedar ho jaana

kisi behosh ka hai KHud-baKHud hushyar ho jaana

karun main KHun ka dawa to pesh-e-dawar-e-mahshar

qayamat hai magar qatil se aankhen chaar ho jaana

shikast-e-be-sutun-o-mauj-e-ju-e-shir shahid hain

nahin aasan rah-e-ishq ka hamwar ho jaana

sharaf hai ye faqat ek ashraf-ul-maKHluq insan ka

faza-e-alam-e-imkan ki had se par ho jaana

ba-qaul-e-'mir' ye insan par tohmat-tarashi hai

kisi majbur ka mumkin nahin muKHtar ho jaana

yun hi yaad-e-KHuda aa jati hai mujh ko kabhi 'shoala'

ki jaise sote sote KHwab se bedar ho jaana