shuur-e-gham ki tanhai se jal-thal ho chuki hai

shu.ūr-e-ġham kī tanhā.ī se jal-thal ho chukī hai

maiñ koī zindagī thā jo mo.attal ho chukī hai

koī imdād kā pahlū nikal aane se pahle

jo mushkil thī hamāre sāmne hal ho chukī hai

sahar kā jism kyoñ takte nahīñ haiñ bastī vaale

shab-e-uftād to āñkhoñ se ojhal ho chukī hai

na ab dikhlāo un se miltā-jultā koī chehra

mire andar kī duniyā kab kī pāgal ho chukī hai

huī nazdīk manzil to nahīñ chalne kā yaarā

badan kamzor hai yā khaal bojhal ho chukī hai

hamāre sar se abr-e-āfiyat guzre to jāneñ

havā raftār meñ kitnī musalsal ho chukī hai

fasīleñ sāmrājī tauq pahne ro rahī haiñ

kahānī shāhzādoñ kī mukammal ho chukī hai

shuur-e-gham ki tanhai se jal-thal ho chuki hai

main koi zindagi tha jo moattal ho chuki hai

koi imdad ka pahlu nikal aane se pahle

jo mushkil thi hamare samne hal ho chuki hai

sahar ka jism kyon takte nahin hain basti wale

shab-e-uftad to aankhon se ojhal ho chuki hai

na ab dikhlao un se milta-julta koi chehra

mere andar ki duniya kab ki pagal ho chuki hai

hui nazdik manzil to nahin chalne ka yara

badan kamzor hai ya khaal bojhal ho chuki hai

hamare sar se abr-e-afiyat guzre to jaanen

hawa raftar mein kitni musalsal ho chuki hai

fasilen samraji tauq pahne ro rahi hain

kahani shahzadon ki mukammal ho chuki hai