shuur-e-gham ko jaga iztirab paida kar

shu.ūr-e-ġham ko jagā iztirāb paidā kar

nafas nafas meñ nayā inqalāb paidā kar

shuā-e-nūr se zarroñ ko de ke tābānī

ik āftāb se laakh āftāb paidā kar

nashāt-e-ġham se mayassar hai zindagī ko faroġh

numūd-e-ġham se ġham-e-be-hisāb paidā kar

hai iztirāb meñ muzmar tirī hayāt kā raaz

sukūñ kā naam na le iztirāb paidā kar

shikast-e-jām pe buniyād-e-ishq-o-mastī rakh

shikast-e-rang se kaif-e-sharāb paidā kar

jahān-e-nau kā tasavvur bajā sahī lekin

jahān-e-husn kā pahle javāb paidā kar

jo zindagī ko banā de ik aa.ina 'jauhar'

ruḳh-e-hayāt meñ vo āb-o-tāb paidā kar

shuur-e-gham ko jaga iztirab paida kar

nafas nafas mein naya inqalab paida kar

shua-e-nur se zarron ko de ke tabani

ek aaftab se lakh aaftab paida kar

nashat-e-gham se mayassar hai zindagi ko farogh

numud-e-gham se gham-e-be-hisab paida kar

hai iztirab mein muzmar teri hayat ka raaz

sukun ka nam na le iztirab paida kar

shikast-e-jam pe buniyaad-e-ishq-o-masti rakh

shikast-e-rang se kaif-e-sharab paida kar

jahan-e-nau ka tasawwur baja sahi lekin

jahan-e-husn ka pahle jawab paida kar

jo zindagi ko bana de ek aaina 'jauhar'

ruKH-e-hayat mein wo aab-o-tab paida kar