sim miTTi ki hai zar miTTi ka hai

siim miTTī kī hai zar miTTī kā hai

phir bhī tālib har bashar miTTī kā hai

ibtidā bhī intihā bhī ḳhaak hai

ziist kyā hai ik safar miTTī kā hai

chaak par chaḌhnā sañvarnā TūTnā

bas ye qissa muḳhtasar miTTī kā hai

ḳhvāb kyā hai ḳhvāb kā anjām kyā

ik gharauñdā ret par miTTī kā hai

maiñ du'ā bārish kī māñgūñ kis tarah

ai daraḳhto merā ghar miTTī kā hai

nibhtī hai donoñ meñ dekheñ kab talak

ek patthar ham-safar miTTī kā hai

vaz'-dārī 'ahd-e-nau meñ hai kahāñ

mujh meñ jo hai vo asar miTTī kā hai

siina hai faulād kā merā 'kamāl'

is ke andar dil magar miTTī kā hai

sim miTTi ki hai zar miTTi ka hai

phir bhi talib har bashar miTTi ka hai

ibtida bhi intiha bhi KHak hai

zist kya hai ek safar miTTi ka hai

chaak par chaDhna sanwarna TuTna

bas ye qissa muKHtasar miTTi ka hai

KHwab kya hai KHwab ka anjam kya

ek gharaunda ret par miTTi ka hai

main du'a barish ki mangun kis tarah

ai daraKHto mera ghar miTTi ka hai

nibhti hai donon mein dekhen kab talak

ek patthar ham-safar miTTi ka hai

waz'-dari 'ahd-e-nau mein hai kahan

mujh mein jo hai wo asar miTTi ka hai

sina hai faulad ka mera 'kamal'

is ke andar dil magar miTTi ka hai