sim-o-zar ki koi tanwir nahin chahti main

sīm-o-zar kī koī tanvīr nahīñ chāhtī maiñ

kisī shahzādī sī taqdīr nahīñ chāhtī maiñ

maktab-e-ishq se vābasta huuñ kaafī hai mujhe

dād-e-'ġhālib' sanad-e-'mīr' nahīñ chāhtī maiñ

faizyābī tirī sohbat hī se miltī hai mujhe

kab tire ishq kī tāsīr nahīñ chāhtī maiñ

qaid ab vasl ke zindāñ meñ tū kar le mujh ko

ye tire hijr kī zanjīr nahīñ chāhtī maiñ

mujh ko itnī bhī na sikhlā tū nishāna baazī

tujh pe chal jaa.e mirā tiir nahīñ chāhtī maiñ

ab to aatā nahīñ 'amabar' vo kabhī sapne meñ

ab kisī ḳhvāb kī ta.abīr nahīñ chāhtī maiñ

sim-o-zar ki koi tanwir nahin chahti main

kisi shahzadi si taqdir nahin chahti main

maktab-e-ishq se wabasta hun kafi hai mujhe

dad-e-'ghaalib' sanad-e-'mir' nahin chahti main

faizyabi teri sohbat hi se milti hai mujhe

kab tere ishq ki tasir nahin chahti main

qaid ab wasl ke zindan mein tu kar le mujh ko

ye tere hijr ki zanjir nahin chahti main

mujh ko itni bhi na sikhla tu nishana bazi

tujh pe chal jae mera tir nahin chahti main

ab to aata nahin 'amabar' wo kabhi sapne mein

ab kisi KHwab ki tabir nahin chahti main