sina-e-sang mein DhunDhta hai gudaz

sīna-e-sañg meñ DhūñDhtā hai gudāz

de ḳhudā dil ko ik aur umr-e-darāz

ham dikhānā bhī chāheñ agar kuchh ko kuchh

ā.inoñ se kareñ kis tarah sāz-bāz

ik taraf ḳhvāb hai ik taraf zindagī

dekhiye kaun hotā hai ab sarfarāz

tere ġham se milī dil ko vo zindagī

tujh se bhī kar diyā hai hameñ be-niyāz

is tarah merī āñkhoñ se aañsū bahe

be-vuzū hī adā ho ga.ī har namāz

rū-ba-rū us ke dil hī ko le kar chaleñ

bah chalegā to ḳhuuñ baj uThegā to saaz

ye jhuke yā kaTe bas tire vāste

mere kāñdhoñ ko de vo sar-e-imtiyāz

un se bhī dil ko 'asrār' kaise kahīñ

raaz ko to ba-har-hāl rakhnā hai raaz

sina-e-sang mein DhunDhta hai gudaz

de KHuda dil ko ek aur umr-e-daraaz

hum dikhana bhi chahen agar kuchh ko kuchh

aainon se karen kis tarah saz-baz

ek taraf KHwab hai ek taraf zindagi

dekhiye kaun hota hai ab sarfaraaz

tere gham se mili dil ko wo zindagi

tujh se bhi kar diya hai hamein be-niyaz

is tarah meri aankhon se aansu bahe

be-wuzu hi ada ho gai har namaz

ru-ba-ru us ke dil hi ko le kar chalen

bah chalega to KHun baj uThega to saz

ye jhuke ya kaTe bas tere waste

mere kandhon ko de wo sar-e-imtiyaz

un se bhi dil ko 'asrar' kaise kahin

raaz ko to ba-har-haal rakhna hai raaz