sina-e-shair gham se bhara hai aankh magar namnak nahin hai

sīna-e-shā.ir ġham se bharā hai aañkh magar namnāk nahīñ hai

roz-e-azal se hai dīvāna dāman lekin chaak nahīñ hai

hijr ke ġham meñ rone vaale terā alam duniyā kī nazar meñ

kal bhī ibrat-nāk nahīñ thā aaj bhī ibrat-nāk nahīñ hai

shikva-ba-lab vo riñd haiñ saaqī aaj bhī tere maiḳhāne meñ

tishna-dahan baiThe haiñ lekin arz-e-talab bebāk nahīñ hai

shā.ir kī āvāra tabī.at asl meñ hai taz.īn-e-mohabbat

nāseh mushfiq tum sab kuchh ho sirf yahī idrāk nahīñ hai

tū hī batā ham aise insāñ terī galī meñ kyuuñ aate haiñ

terī adā.eñ shoḳh nahīñ haiñ terī nazar bebāk nahīñ hai

maiñ hī kyā kuchh aur yagāne merī tarah haiñ tere divāne

parvānoñ kī ḳhaak meñ shāmil lekin merī ḳhaak nahīñ hai

tum ne 'azīz' us kī mahfil meñ shab na sahī lamhe tū guzāre

mustaqbil kī fikr to kyuuñ ho haal bhī hasrat-nāk nahīñ hai

sina-e-shair gham se bhara hai aankh magar namnak nahin hai

roz-e-azal se hai diwana daman lekin chaak nahin hai

hijr ke gham mein rone wale tera alam duniya ki nazar mein

kal bhi ibrat-nak nahin tha aaj bhi ibrat-nak nahin hai

shikwa-ba-lab wo rind hain saqi aaj bhi tere maiKHane mein

tishna-dahan baiThe hain lekin arz-e-talab bebak nahin hai

shair ki aawara tabiat asl mein hai tazin-e-mohabbat

naseh mushfiq tum sab kuchh ho sirf yahi idrak nahin hai

tu hi bata hum aise insan teri gali mein kyun aate hain

teri adaen shoKH nahin hain teri nazar bebak nahin hai

main hi kya kuchh aur yagane meri tarah hain tere diwane

parwanon ki KHak mein shamil lekin meri KHak nahin hai

tum ne 'aziz' us ki mahfil mein shab na sahi lamhe tu guzare

mustaqbil ki fikr to kyun ho haal bhi hasrat-nak nahin hai