sinche gae jo zaKHm dawa se nikhar gae

sīñche ga.e jo zaḳhm davā se nikhar ga.e

ḳhālī hamāre dar se sabhī chārāgar ga.e

mushkil hai mere dil meñ tire ġham ko DhūñDnā

sāgar meñ aise kitne hī dariyā utar ga.e

maiñ is liye bhī dauḌ meñ aage nikal gayā

mere harīf vaqt se pahle Thahar ga.e

aa.ī ḳhizāñ to ishq ke ma.anī patā chale

pattoñ ke saath shāḳhoñ se kuchh phuul jhaḌ ga.e

laḌkoñ ko lag rahī thī mohabbat hasīn shai

merī misāl dī ga.ī saare sudhar ga.e

jaise nadī kā hashr samundar meñ girnā hai

vaise ye sānahe sabhī mujh par guzar ga.e

tum hī nahīñ ga.e ho mujhe chhoḌ kar 'amulya'

jaao tumhāre jaise ka.ī log mar ga.e

sinche gae jo zaKHm dawa se nikhar gae

KHali hamare dar se sabhi chaaragar gae

mushkil hai mere dil mein tere gham ko DhunDna

sagar mein aise kitne hi dariya utar gae

main is liye bhi dauD mein aage nikal gaya

mere harif waqt se pahle Thahar gae

aai KHizan to ishq ke mani pata chale

patton ke sath shaKHon se kuchh phul jhaD gae

laDkon ko lag rahi thi mohabbat hasin shai

meri misal di gai sare sudhar gae

jaise nadi ka hashr samundar mein girna hai

waise ye sanahe sabhi mujh par guzar gae

tum hi nahin gae ho mujhe chhoD kar 'amulya'

jao tumhaare jaise kai log mar gae