sinchiye paudhon ko to phul wa phal dete hain

sīñchiye paudhoñ ko to phuul va phal dete haiñ

vaqt lagtā hai magar kuchh to badal dete haiñ

aise logoñ kī taraqqī nahīñ ruktī hai kabhī

vaqt ke prashnoñ kā do Tuuk jo hal dete haiñ

bāġhbāñ un ko banāne pe lage haiñ kuchh log

lahlahātī huī kaliyāñ jo masal dete haiñ

vaqt un kā koī nuqsān nahīñ kar paatā

vaqt paḌne pe jo ḳhud vaqt badal dete haiñ

sabhyatā gūñjtī hai aaj bhī aivānoñ meñ

ham farishta-sifat insān aTal dete haiñ

uñgliyāñ kāTne vāloñ ko ḳhabar kar denā

haath dushman ke bhī ham log kamal dete haiñ

jo mohabbat ke pujārī haiñ vo duniyā bhar ko

tiir talvār nahīñ dete ġhazal dete haiñ

aaj ke daur kā itihās bhī likhiye sāhib

aap to bas hameñ guzrā huā pal dete haiñ

'anjanā' ahl-e-mohabbat ko mohabbat vaale

ik mohabbat kā nishāñ tāj-mahal dete haiñ

sinchiye paudhon ko to phul wa phal dete hain

waqt lagta hai magar kuchh to badal dete hain

aise logon ki taraqqi nahin rukti hai kabhi

waqt ke prashnon ka do Tuk jo hal dete hain

baghban un ko banane pe lage hain kuchh log

lahlahati hui kaliyan jo masal dete hain

waqt un ka koi nuqsan nahin kar pata

waqt paDne pe jo KHud waqt badal dete hain

sabhyata gunjti hai aaj bhi aiwanon mein

hum farishta-sifat insan aTal dete hain

ungliyan kaTne walon ko KHabar kar dena

hath dushman ke bhi hum log kamal dete hain

jo mohabbat ke pujari hain wo duniya bhar ko

tir talwar nahin dete ghazal dete hain

aaj ke daur ka itihas bhi likhiye sahib

aap to bas hamein guzra hua pal dete hain

'anjana' ahl-e-mohabbat ko mohabbat wale

ek mohabbat ka nishan taj-mahal dete hain