sine hain chaak aur gareban sile hue

siine haiñ chaak aur garebāñ sile hue

tūfāñ haiñ sat.h-e-āb ke nīche chhupe hue

ik umr-e-muḳhtasar bhī guzārī nahīñ ga.ī

sadiyāñ agarche guzrī haiñ dukh jhelte hue

ranj-e-shikasta-pā.ī hai ik zād-e-rāh-e-shauq

aur 'umr hone aa.ī hai ghar se chale hue

kab faiz pā sakā koī shāḳh-e-burīda se

kuchh phuul shāḳh par haiñ abhī tak lage hue

bhūle the sañg-hā-e-malāmat ko ham magar

kuchh zaḳhm is bahār meñ phir se hare hue

vā kar diye haiñ baḳhiye ne lākhoñ dahān-e-zaḳhm

baiThe haiñ jab se apne laboñ ko siye hue

'ishqī tū pūchh kaise chhuTā kārvāñ kā saath

muḌ muḌ ke log guzre hameñ dekhe hue

sine hain chaak aur gareban sile hue

tufan hain sath-e-ab ke niche chhupe hue

ek umr-e-muKHtasar bhi guzari nahin gai

sadiyan agarche guzri hain dukh jhelte hue

ranj-e-shikasta-pai hai ek zad-e-rah-e-shauq

aur 'umr hone aai hai ghar se chale hue

kab faiz pa saka koi shaKH-e-burida se

kuchh phul shaKH par hain abhi tak lage hue

bhule the sang-ha-e-malamat ko hum magar

kuchh zaKHm is bahaar mein phir se hare hue

wa kar diye hain baKHiye ne lakhon dahan-e-zaKHm

baiThe hain jab se apne labon ko siye hue

'ishqi tu puchh kaise chhuTa karwan ka sath

muD muD ke log guzre hamein dekhe hue