sine ki misal aag hai chandi sa dhuan hai

siine kī misāl aag hai chāñdī sā dhuāñ hai

kyā ḳhuub mire ghar kī tabāhī kā samāñ hai

dekhūñ to mire ġham meñ sharīk ek zamāna

sochūñ to yahāñ koī makīñ hai na makāñ hai

kis darja tilismī hai mire gaañv kā manzar

sūkhe hue har khet pe sabze kā gumāñ hai

aisā bhī koī shahr-e-tamannā hai zamīñ par

luTne kā jahāñ ḳhauf na andesha-e-jāñ hai

pītal kā ḳharīdār samajhte haiñ mujhe log

har shaḳhs kī bāzār meñ chāñdī kī dukāñ hai

aarī hai magar zaḳhm se har sāya-e-dīvār

har chand kī dīvār pe bārish kā nishāñ hai

patthar ke kisī shahr meñ ābād hai 'shāhid'

hai mom kā insān to shīshe kā makāñ hai

sine ki misal aag hai chandi sa dhuan hai

kya KHub mere ghar ki tabahi ka saman hai

dekhun to mere gham mein sharik ek zamana

sochun to yahan koi makin hai na makan hai

kis darja tilismi hai mere ganw ka manzar

sukhe hue har khet pe sabze ka guman hai

aisa bhi koi shahr-e-tamanna hai zamin par

luTne ka jahan KHauf na andesha-e-jaan hai

pital ka KHaridar samajhte hain mujhe log

har shaKHs ki bazar mein chandi ki dukan hai

aari hai magar zaKHm se har saya-e-diwar

har chand ki diwar pe barish ka nishan hai

patthar ke kisi shahr mein aabaad hai 'shahid'

hai mom ka insan to shishe ka makan hai