sine mein agar ho dil-e-bedar-e-mohabbat

siine meñ agar ho dil-e-bedār-e-mohabbat

har saañs hai paiġhambar-e-asrār-e-mohabbat

vo bhī hue jaate haiñ taraf-dār-e-mohabbat

achchhe nazar aate nahīñ āsār-e-mohabbat

hushiyār ho ai be-ḳhud-o-sarshār-e-mohabbat

iz.hār-e-mohabbat! are iz.hār-e-mohabbat

tā-der na ho dil bhī ḳhabar-dār-e-mohabbat

ik ye bhī hai andāz-e-fusūñ-kār-e-mohabbat

tauhīn-e-nigāh-e-karam-e-yār kahāñ tak

dam lene de ai lazzat-e-āzār-e-mohabbat

sab phūñk diye ḳhār-o-ḳhas-e-maz.hab-o-millat

allāh-re yak-sho.ala-e-ruḳhsār-e-mohabbat

kaunain se kyā ahl-e-muhabbat ko sarokār

kaunain hai ḳhud hāshiya-bardār-e-mohabbat

jo arsh kī rif.at ko bhī us dar pe jhukā de

aisā bhī koī jazba-e-sarshār-e-mohabbat

maiñ ne inheñ tārīk fazāoñ meñ bhī aksar

dekhe haiñ baraste hue anvār-e-mohabbat

nāseh ko hai kyuuñ merī mohabbat se sarokār

chehre se to khulte nahīñ āsār-e-mohabbat

maiñ aur ye namkīn-e-ġham-e-ishq are tauba

tū aur ye ehsās-e-girāñ-bār-e-mohabbat!

ab arz-e-mohabbat kī 'jigar' kyuuñ nahīñ jur.at

vo sāmne haiñ garm hai bāzār-e-mohabbat

sine mein agar ho dil-e-bedar-e-mohabbat

har sans hai paighambar-e-asrar-e-mohabbat

wo bhi hue jate hain taraf-dar-e-mohabbat

achchhe nazar aate nahin aasar-e-mohabbat

hushiyar ho ai be-KHud-o-sarshaar-e-mohabbat

izhaar-e-mohabbat! are izhaar-e-mohabbat

ta-der na ho dil bhi KHabar-dar-e-mohabbat

ek ye bhi hai andaz-e-fusun-kar-e-mohabbat

tauhin-e-nigah-e-karam-e-yar kahan tak

dam lene de ai lazzat-e-azar-e-mohabbat

sab phunk diye KHar-o-KHas-e-mazhab-o-millat

allah-re yak-shoala-e-ruKHsar-e-mohabbat

kaunain se kya ahl-e-muhabbat ko sarokar

kaunain hai KHud hashiya-bardar-e-mohabbat

jo arsh ki rifat ko bhi us dar pe jhuka de

aisa bhi koi jazba-e-sarshaar-e-mohabbat

main ne inhen tarik fazaon mein bhi aksar

dekhe hain baraste hue anwar-e-mohabbat

naseh ko hai kyun meri mohabbat se sarokar

chehre se to khulte nahin aasar-e-mohabbat

main aur ye namkin-e-gham-e-ishq are tauba

tu aur ye ehsas-e-giran-bar-e-mohabbat!

ab arz-e-mohabbat ki 'jigar' kyun nahin jurat

wo samne hain garm hai bazar-e-mohabbat