sine mein dil misal-e-chaman-dar-chaman to ho

siine meñ dil misāl-e-chaman-dar-chaman to ho

jo zaḳhm ho harīf-e-gul-o-yāsman to ho

do din kī zindagī bhī baḌī chiiz hai magar

jiine ke Dhang meñ zarā mastāna-pan to ho

dil aap apnī zaat se ik anjuman sahī

dil bastagī ke vāste koī lagan to ho

ye kyā ki sirf chāk-e-garebāñ pe iktifā

vahshat ba-qadr-e-rang-e-bahār-e-chaman to ho

khul jā.egā hai kaun sazā-vār-e-mai-kashī

sāmān-e-āzmā.ish-e-kām-o-dahan to ho

sāz-e-dil-e-hazīñ se bhī naġhme ubal paḌeñ

koī nigāh-e-nāz kabhī zaḳhma-zan to ho

ye bhī ḳhizāñ ke dast-e-sitam se bache raheñ

phūloñ meñ misl-e-ḳhār koī bāñkpan to ho

tashbīh deñ jise qad-o-gesū-e-yār se

gulshan meñ aisā manzar-e-sarv-o-saman to ho

sine mein dil misal-e-chaman-dar-chaman to ho

jo zaKHm ho harif-e-gul-o-yasman to ho

do din ki zindagi bhi baDi chiz hai magar

jine ke Dhang mein zara mastana-pan to ho

dil aap apni zat se ek anjuman sahi

dil bastagi ke waste koi lagan to ho

ye kya ki sirf chaak-e-gareban pe iktifa

wahshat ba-qadr-e-rang-e-bahaar-e-chaman to ho

khul jaega hai kaun saza-war-e-mai-kashi

saman-e-azmaish-e-kaam-o-dahan to ho

saz-e-dil-e-hazin se bhi naghme ubal paDen

koi nigah-e-naz kabhi zaKHma-zan to ho

ye bhi KHizan ke dast-e-sitam se bache rahen

phulon mein misl-e-KHar koi bankpan to ho

tashbih den jise qad-o-gesu-e-yar se

gulshan mein aisa manzar-e-sarw-o-saman to ho