sine mein liye jine ke arman hazaron

siine meñ liye jiine ke armān hazāroñ

mar jaate haiñ har din yahāñ insān hazāroñ

sab husn ko ma.asūm samajhte haiñ jahāñ meñ

aur ishq ke māthe pe haiñ bohtān hazāroñ

har zaḳhm ne baḳhshī hai jilā mere junūñ ko

qātil tirī shamshīr ke ehsān hazāroñ

lā-hāsilī āḳhir ko hai har chiiz kā hāsil

har naf.a ke pahlū meñ haiñ nuqsān hazāroñ

ik zabt kī dīvār sambhāle rahī mujh ko

har chand uThe mujh meñ bhī tūfān hazāroñ

kuchh baat to us shoḳh meñ aisī hai yaqīnan

phirte haiñ hathelī pe liye jaan hazāroñ

ai kaash mire sher pe kahtā koī 'raḳhshāñ'

qurbān tire sher par dīvān hazāroñ

sine mein liye jine ke arman hazaron

mar jate hain har din yahan insan hazaron

sab husn ko masum samajhte hain jahan mein

aur ishq ke mathe pe hain bohtan hazaron

har zaKHm ne baKHshi hai jila mere junun ko

qatil teri shamshir ke ehsan hazaron

la-hasili aaKHir ko hai har chiz ka hasil

har nafa ke pahlu mein hain nuqsan hazaron

ek zabt ki diwar sambhaale rahi mujh ko

har chand uThe mujh mein bhi tufan hazaron

kuchh baat to us shoKH mein aisi hai yaqinan

phirte hain hatheli pe liye jaan hazaron

ai kash mere sher pe kahta koi 'raKHshan'

qurban tere sher par diwan hazaron