siine mohabbatoñ se munavvar kiye ga.e
ham dūsroñ se aise bhī behtar kiye ga.e
vaise tumhārā ḳhauf bhī kaafī ziyāda thā
kuchh faisle to ḳhud se bhī Dar kar kiye ga.e
yak dam kisī ne ham ko gale se lagā liyā
sahrā se ek pal meñ samundar kiye ga.e
bā-qā.edā hamārā liyā jā rahā thā naam
phir dekhte hī dekhte dīgar kiye ga.e
ab aa.ine ke aage khaḌe sochte haiñ ham
kuchh tajrabe ziyāda hī ḳhud par kiye ga.e
ab aap in ko she'r kaheñ yā nahīñ kaheñ
kuchh rañj the jo dāḳhil-e-daftar kiye ga.e
sine mohabbaton se munawwar kiye gae
hum dusron se aise bhi behtar kiye gae
waise tumhaara KHauf bhi kafi ziyaada tha
kuchh faisle to KHud se bhi Dar kar kiye gae
yak dam kisi ne hum ko gale se laga liya
sahra se ek pal mein samundar kiye gae
ba-qaeda hamara liya ja raha tha nam
phir dekhte hi dekhte digar kiye gae
ab aaine ke aage khaDe sochte hain hum
kuchh tajrabe ziyaada hi KHud par kiye gae
ab aap in ko she'r kahen ya nahin kahen
kuchh ranj the jo daKHil-e-daftar kiye gae
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.