sikhae waqt ne atwar sad hazar mujhe

sikhā.e vaqt ne atvār sad hazār mujhe

ki ab to choT bhī rahtī hai sāzgār mujhe

nikāl de mire dil se adā-o-nāz sabhī

bigaḌ gayā huuñ ġham-e-zindagī sañvār mujhe

maiñ tere paas ghaḌī do-ghaḌī kā mehmāñ huuñ

agarche vaqt kaḌā huuñ magar guzār mujhe

diyā jo haath mire haath meñ tū chupke se

thamā gayā hai koī dard be-shumār mujhe

yaqīñ bhī hai ki use lauT kar nahīñ aanā

magar hai shām-o-sahar phir bhī intizār mujhe

koī to hai pas-e-dīvār-o-dar nihāñ 'azmī'

pukārtā hai sar-e-shām baar baar mujhe

sikhae waqt ne atwar sad hazar mujhe

ki ab to choT bhi rahti hai sazgar mujhe

nikal de mere dil se ada-o-naz sabhi

bigaD gaya hun gham-e-zindagi sanwar mujhe

main tere pas ghaDi do-ghaDi ka mehman hun

agarche waqt kaDa hun magar guzar mujhe

diya jo hath mere hath mein tu chupke se

thama gaya hai koi dard be-shumar mujhe

yaqin bhi hai ki use lauT kar nahin aana

magar hai sham-o-sahar phir bhi intizar mujhe

koi to hai pas-e-diwar-o-dar nihan 'azmi'

pukarta hai sar-e-sham bar bar mujhe