silsila sanson ka yun be-zabta ho jaega

silsila sāñsoñ kā yuuñ be-zābta ho jā.egā

raat din piinā hī jehd-e-lā-baqā ho jā.egā

juz-o-lā-yanfak rahe gar ziist ke karb-o-alam

merā apnā aap kuchh ho ain lā ho jā.egā

gar yūñhī īzā-kash-e-hālāt rahnā hī paḌā

kuchh kā kuchh sab aur jaane kyā se kyā ho jā.egā

ba.ad tere piiTh sūraj kī taraf karnī paḌī

ho na ho ab mujh se saaya bhī judā ho jā.egā

din-ba-din girte rahe aqdār to anjām-e-kār

kal ko jo kuchh nā-ravā thā sab ravā ho jā.egā

qāfile yādoñ ke yuuñ aate rahe to ek din

qatra qatra āñsuoñ kā be-hayā ho jā.egā

sirf ik jast-e-junūñ tak hai ye dasht īn-o-āñ

ba.ad is ke jo bhī khoTā hai kharā ho jā.egā

Duub jā.ūñgā kisī sāġhar meñ ik din merā kyā

jis kā jo kuchh bhī hai mujh par vo adā ho jā.egā

silsila sanson ka yun be-zabta ho jaega

raat din pina hi jehd-e-la-baqa ho jaega

juz-o-la-yanfak rahe gar zist ke karb-o-alam

mera apna aap kuchh ho ain la ho jaega

gar yunhi iza-kash-e-haalat rahna hi paDa

kuchh ka kuchh sab aur jaane kya se kya ho jaega

baad tere piTh suraj ki taraf karni paDi

ho na ho ab mujh se saya bhi juda ho jaega

din-ba-din girte rahe aqdar to anjam-e-kar

kal ko jo kuchh na-rawa tha sab rawa ho jaega

qafile yaadon ke yun aate rahe to ek din

qatra qatra aansuon ka be-haya ho jaega

sirf ek jast-e-junun tak hai ye dasht in-o-an

baad is ke jo bhi khoTa hai khara ho jaega

Dub jaunga kisi saghar mein ek din mera kya

jis ka jo kuchh bhi hai mujh par wo ada ho jaega