sirf sach aur jhuT ki mizan mein rakkhe rahe

sirf sach aur jhuuT kī mīzān meñ rakkhe rahe

ham bahādur the magar maidān meñ rakkhe rahe

jugnuoñ ne phir añdheroñ se laḌā.ī jiit lī

chāñd sūraj ghar ke raushan-dān meñ rakkhe rahe

dhīre dhīre saarī kirneñ ḳhud-kushī karne lagīñ

ham sahīfa the magar juzdān meñ rakkhe rahe

band kamre khol kar sachchā.iyāñ rahne lagīñ

ḳhvāb kachchī dhuup the dālān meñ rakkhe rahe

sirf itnā fāsla hai zindagī se maut kā

shāḳh se toḌe ga.e gul-dān meñ rakkhe rahe

zindagī bhar apnī gūñgī dhaḌkanoñ ke saath saath

ham bhī ghar ke qīmtī sāmān meñ rakkhe rahe

sirf sach aur jhuT ki mizan mein rakkhe rahe

hum bahadur the magar maidan mein rakkhe rahe

jugnuon ne phir andheron se laDai jit li

chand suraj ghar ke raushan-dan mein rakkhe rahe

dhire dhire sari kirnen KHud-kushi karne lagin

hum sahifa the magar juzdan mein rakkhe rahe

band kamre khol kar sachchaiyan rahne lagin

KHwab kachchi dhup the dalan mein rakkhe rahe

sirf itna fasla hai zindagi se maut ka

shaKH se toDe gae gul-dan mein rakkhe rahe

zindagi bhar apni gungi dhaDkanon ke sath sath

hum bhi ghar ke qimti saman mein rakkhe rahe