sitam hai dil ke dhaDakne ko bhi qarar kahen

sitam hai dil ke dhaḌakne ko bhī qarār kaheñ

tumhāre jabr ko apnā hī iḳhtiyār kaheñ

sukūñ vahī hai jise chāra-gar sukūñ kah deñ

kahāñ ye izn ki kuchh tere be-qarār kaheñ

chhupā.eñ dāġh-e-jigar phuul jitnā mumkin ho

kahīñ na ahl-e-nazar un ko dil-figār kaheñ

fazā hai un kī chaman un ke āshiyāñ un ke

ḳhizāñ ke zaḳhm ko jo ġhuncha-e-bahār kaheñ

piye haiñ ashk hazāroñ to lab pe aa.ī hai

vo ik hañsī ki jise farz-e-nāgavār kaheñ

añdherī shab meñ jaleñge charāġh ban ban ke

vo naqsh-e-pā ki jinheñ raah kā ġhubār kaheñ

samajh sakegā vahāñ kaun rāz-e-mai-ḳhāna

'nasīm' tishna-labī ko jahāñ ḳhumār kaheñ

sitam hai dil ke dhaDakne ko bhi qarar kahen

tumhaare jabr ko apna hi iKHtiyar kahen

sukun wahi hai jise chaara-gar sukun kah den

kahan ye izn ki kuchh tere be-qarar kahen

chhupaen dagh-e-jigar phul jitna mumkin ho

kahin na ahl-e-nazar un ko dil-figar kahen

faza hai un ki chaman un ke aashiyan un ke

KHizan ke zaKHm ko jo ghuncha-e-bahaar kahen

piye hain ashk hazaron to lab pe aai hai

wo ek hansi ki jise farz-e-nagawar kahen

andheri shab mein jalenge charagh ban ban ke

wo naqsh-e-pa ki jinhen rah ka ghubar kahen

samajh sakega wahan kaun raaz-e-mai-KHana

'nasim' tishna-labi ko jahan KHumar kahen