sitam ka zikr kya hum ko sitam achchhe nahin lagte

sitam kā zikr kyā ham ko sitam achchhe nahīñ lagte

ye jhūTā pyaar ye jhūTe bharam achchhe nahīñ lagte

masarrat kī farāvānī unheñ kyā raas aa.egī

jinheñ ai zindagānī tere ġham achchhe nahīñ lagte

hamāre saath chalnā hai to azm-o-hausla rakhnā

vafā kī raah meñ bahke qadam achchhe nahīñ lagte

kisī bhī qaum ke vo naujavāñ hoñ un ke hāthoñ meñ

qalam to achchhe lagte haiñ ye bam achchhe nahīñ lagte

ḳhamoshī ik haqīqat hai magar kyā kījiye is ko

hameñ mahfil meñ patthar ke sanam achchhe nahīñ lagte

unheñ tārīḳh ke aurāq meñ munkir likhā jaa.e

jo kahte haiñ hameñ dair-o-haram achchhe nahīñ lagte

jo kal tak ḳhud pe nāzāñ the hamāre ham-nashīñ ho kar

unhīñ logoñ ko ab 'bedār' ham achchhe nahīñ lagte

sitam ka zikr kya hum ko sitam achchhe nahin lagte

ye jhuTa pyar ye jhuTe bharam achchhe nahin lagte

masarrat ki farawani unhen kya ras aaegi

jinhen ai zindagani tere gham achchhe nahin lagte

hamare sath chalna hai to azm-o-hausla rakhna

wafa ki rah mein bahke qadam achchhe nahin lagte

kisi bhi qaum ke wo naujawan hon un ke hathon mein

qalam to achchhe lagte hain ye bam achchhe nahin lagte

KHamoshi ek haqiqat hai magar kya kijiye is ko

hamein mahfil mein patthar ke sanam achchhe nahin lagte

unhen tariKH ke auraq mein munkir likha jae

jo kahte hain hamein dair-o-haram achchhe nahin lagte

jo kal tak KHud pe nazan the hamare ham-nashin ho kar

unhin logon ko ab 'bedar' hum achchhe nahin lagte