sitam ke baad bhi baqi karam ki aas to hai

sitam ke baa'd bhī baaqī karam kī aas to hai

vafā shi'ār nahīñ vo vafā shanās to hai

vo dil kī baat zabāñ se na kuchh kaheñ shāyad

hamāre haal pe chehra magar udaas to hai

ye dil-fareb banāras kī sub.h kā manzar

avadh kī shām-e-dil-ārā hamāre paas to hai

bharam rahegā tire mai-kade kā bhī saaqī

balā se ḳhālī sahī haath meñ gilās to hai

chale hī jaa.eñ nigāhoñ se duur aap magar

hasīn yādoñ kī daulat hamāre paas to hai

kare bhale hī na rahmat kī mujh pe tū bārish

tire karam kī mire dil meñ ek aas to hai

ye sach hai us ne bujhā.ī na tishnagī lekin

hamārī tishna-dahānī kā us ko paas to hai

durust hai ki farishta-sifat nahīñ 'dānish'

ḳhudā gavāh basīrat kī us ko pyaas to hai

sitam ke ba'd bhi baqi karam ki aas to hai

wafa shi'ar nahin wo wafa shanas to hai

wo dil ki baat zaban se na kuchh kahen shayad

hamare haal pe chehra magar udas to hai

ye dil-fareb banaras ki subh ka manzar

awadh ki sham-e-dil-ara hamare pas to hai

bharam rahega tere mai-kade ka bhi saqi

bala se KHali sahi hath mein gilas to hai

chale hi jaen nigahon se dur aap magar

hasin yaadon ki daulat hamare pas to hai

kare bhale hi na rahmat ki mujh pe tu barish

tere karam ki mere dil mein ek aas to hai

ye sach hai us ne bujhai na tishnagi lekin

hamari tishna-dahani ka us ko pas to hai

durust hai ki farishta-sifat nahin 'danish'

KHuda gawah basirat ki us ko pyas to hai