sitam ke baad karam ki ada bhi KHub rahi

sitam ke ba.ad karam kī adā bhī ḳhuub rahī

jafā to ḳhair jafā thī vafā bhī ḳhuub rahī

ba-faiz-e-gardish-e-daurāñ unheñ bhī pyaar aayā

ba-pās-e-maslahat un kī razā bhī ḳhuub rahī

ba-sad-ḳhulūs qanā.at kī daad miltī hai

gadā-navāzī-e-ahl-e-saḳhā bhī ḳhuub rahī

lagī hai mohr muqaddar kī daane daane par

ye ḳhush-mazāqī-e-shān-e-ḳhudā bhī ḳhuub rahī

kahīñ shikam ke taqāze nazar nahīñ aate

charāġh-e-dair-o-haram kī ziyā bhī ḳhuub rahī

hamāre haath se aatī hai bū-e-pairāhan

hamāre husn-e-talab kī adā bhī ḳhuub rahī

sitam ke baad karam ki ada bhi KHub rahi

jafa to KHair jafa thi wafa bhi KHub rahi

ba-faiz-e-gardish-e-dauran unhen bhi pyar aaya

ba-pas-e-maslahat un ki raza bhi KHub rahi

ba-sad-KHulus qanaat ki dad milti hai

gada-nawazi-e-ahl-e-saKHa bhi KHub rahi

lagi hai mohr muqaddar ki dane dane par

ye KHush-mazaqi-e-shan-e-KHuda bhi KHub rahi

kahin shikam ke taqaze nazar nahin aate

charagh-e-dair-o-haram ki ziya bhi KHub rahi

hamare hath se aati hai bu-e-pairahan

hamare husn-e-talab ki ada bhi KHub rahi