sitam ki tegh chali tir bhi jafa ke chale

sitam kī teġh chalī tiir bhī jafā ke chale

jo baat haq thī sar-e-dār ham sunā ke chale

kuchh aisī duur na thiiñ manzileñ mohabbat kī

vufūr-e-shauq meñ ham fāsle baḌhā ke chale

jo āb-o-dāna chaman se uThā chaman vaalo

har ek shāḳh pe ham āshiyāñ banā ke chale

uThe to mahfil-e-rindāñ se tishna-kām magar

qadam qadam pe ham ek mai-kada banā ke chale

sulag sulag ke rahe jo diyā bujhā na sake

ga.e to jaate hue aag vo lagā ke chale

'ḳhayālī' she'r hai kyā ye to ahl-e-fan jāneñ

ham apne dil kī ba-shakl-e-ġhazal sunā ke chale

sitam ki tegh chali tir bhi jafa ke chale

jo baat haq thi sar-e-dar hum suna ke chale

kuchh aisi dur na thin manzilen mohabbat ki

wufur-e-shauq mein hum fasle baDha ke chale

jo aab-o-dana chaman se uTha chaman walo

har ek shaKH pe hum aashiyan bana ke chale

uThe to mahfil-e-rindan se tishna-kaam magar

qadam qadam pe hum ek mai-kada bana ke chale

sulag sulag ke rahe jo diya bujha na sake

gae to jate hue aag wo laga ke chale

'KHayali' she'r hai kya ye to ahl-e-fan jaanen

hum apne dil ki ba-shakl-e-ghazal suna ke chale