sitam mein bhi shan-e-karam dekhte hain

sitam meñ bhī shān-e-karam dekhte haiñ

hameñ jānte haiñ jo ham dekhte haiñ

jahāñ tak ta.alluq hai aib o ḳhatā kā

jo ahl-e-nazar haiñ vo kam dekhte haiñ

tirā intizār is qadar baḌh gayā hai

ki har aane vaale ko ham dekhte haiñ

nazar sū-e-kāba hai dil but-kade meñ

ham andāz-e-ahl-e-haram dekhte haiñ

nigāheñ yūñhī mil ga.iiñ be-irāda

na vo dekhte haiñ na ham dekhte haiñ

ye duniyā to kyā hai sar-e-arsh-e-āzam

ham apnā hī naqsh-e-qadam dekhte haiñ

kise apnā hāl-e-pareshāñ sunā.eñ

pareshāñ zamāne ko ham dekhte haiñ

mirī manzilat kuchh isī se samajhiye

mirī raah dair o haram dekhte haiñ

tirī justujū meñ ham ahl-e-tamannā

ḳhushī dekhte haiñ na ġham dekhte haiñ

'mushīr' ahl-e-bīnash mirī har ġhazal meñ

dimāġh aur dil ko baham dekhte haiñ

sitam mein bhi shan-e-karam dekhte hain

hamein jaante hain jo hum dekhte hain

jahan tak talluq hai aib o KHata ka

jo ahl-e-nazar hain wo kam dekhte hain

tera intizar is qadar baDh gaya hai

ki har aane wale ko hum dekhte hain

nazar su-e-kaba hai dil but-kade mein

hum andaz-e-ahl-e-haram dekhte hain

nigahen yunhi mil gain be-irada

na wo dekhte hain na hum dekhte hain

ye duniya to kya hai sar-e-arsh-e-azam

hum apna hi naqsh-e-qadam dekhte hain

kise apna haal-e-pareshan sunaen

pareshan zamane ko hum dekhte hain

meri manzilat kuchh isi se samajhiye

meri rah dair o haram dekhte hain

teri justuju mein hum ahl-e-tamanna

KHushi dekhte hain na gham dekhte hain

'mushir' ahl-e-binash meri har ghazal mein

dimagh aur dil ko baham dekhte hain