sitam sahne ki tayyari bhi koi chiz hoti hai

sitam sahne kī tayyārī bhī koī chiiz hotī hai

mohabbat meñ vafādārī bhī koī chiiz hotī hai

bahut ham ḳhud-ġharaz the jab mohabbat kī to ye jaanā

ki apnī jaan se pyārī bhī koī chiiz hotī hai

zarūrī to nahīñ har baat hoñThoñ se kahī jaa.e

nigāhoñ kī adākārī bhī koī chiiz hotī hai

agar āñkhoñ se bah jaa.eñ to ho jaatā hai dil halkā

badan meñ ashk se bhārī bhī koī chiiz hotī hai

taqāze us se ham hī kyuuñ kareñ har roz milne ke

hamārī apnī ḳhuddārī bhī koī chiiz hotī hai

hamāre ḳhat jahāñ paḌhte ho yuuñ hī Daal dete ho

are kamre meñ almārī bhī koī chiiz hotī hai

taraf-dārī tumheñ aatī hai apne ghar ke logoñ kī

miyāñ merī taraf-dārī bhī koī chiiz hotī hai

ayādat ke bahāne mere ghar vo roz aate haiñ

mohabbat vāloñ bīmārī bhī koī chiiz hotī hai

sitam sahne ki tayyari bhi koi chiz hoti hai

mohabbat mein wafadari bhi koi chiz hoti hai

bahut hum KHud-gharaz the jab mohabbat ki to ye jaana

ki apni jaan se pyari bhi koi chiz hoti hai

zaruri to nahin har baat honThon se kahi jae

nigahon ki adakari bhi koi chiz hoti hai

agar aankhon se bah jaen to ho jata hai dil halka

badan mein ashk se bhaari bhi koi chiz hoti hai

taqaze us se hum hi kyun karen har roz milne ke

hamari apni KHuddari bhi koi chiz hoti hai

hamare KHat jahan paDhte ho yun hi Dal dete ho

are kamre mein almari bhi koi chiz hoti hai

taraf-dari tumhein aati hai apne ghar ke logon ki

miyan meri taraf-dari bhi koi chiz hoti hai

ayaadat ke bahane mere ghar wo roz aate hain

mohabbat walon bimari bhi koi chiz hoti hai