sitam sahte hue har din nai KHwahish se Darta hun

sitam sahte hue har din na.ī ḳhvāhish se Dartā huuñ

mirī āñkhoñ meñ ġham hai aur maiñ bārish se Dartā huuñ

mirī pākīzgī ne hī banāyā hai mujhe munsif

so maiñ insāf karte vaqt har laġhzish se Dartā huuñ

diloñ kī vus.atoñ ko baañT hī saktī nahīñ duniyā

maiñ qistoñ meñ bañTā huuñ aur paimā.ish se Dartā huuñ

jalātā huuñ mohabbat ke diye nafrat ke āñgan meñ

nazar rakhtā huuñ dushman par har ik shorish se Dartā huuñ

mirī āvārgī mujh ko kahīñ rukne nahīñ detī

parinda huuñ rihā.ish kī har ik ḳhvāhish se Dartā huuñ

ġhazal meñ justujū rakhtā huuñ maiñ mafhūm-e-tāzā kā

mire nāqid maiñ ḳhud lafzoñ kī ārā.ish se Dartā huuñ

ajab ehsās kī manzil pe aa pahuñchā huuñ ai 'rāhī'

lagātā huuñ diloñ meñ aag aur jumbish se Dartā hoñ

sitam sahte hue har din nai KHwahish se Darta hun

meri aankhon mein gham hai aur main barish se Darta hun

meri pakizgi ne hi banaya hai mujhe munsif

so main insaf karte waqt har laghzish se Darta hun

dilon ki wusaton ko banT hi sakti nahin duniya

main qiston mein banTa hun aur paimaish se Darta hun

jalata hun mohabbat ke diye nafrat ke aangan mein

nazar rakhta hun dushman par har ek shorish se Darta hun

meri aawargi mujh ko kahin rukne nahin deti

parinda hun rihaish ki har ek KHwahish se Darta hun

ghazal mein justuju rakhta hun main mafhum-e-taza ka

mere naqid main KHud lafzon ki aaraish se Darta hun

ajab ehsas ki manzil pe aa pahuncha hun ai 'rahi'

lagata hun dilon mein aag aur jumbish se Darta hon