sitamgaron ne tarasha hai ek bahana naya

sitamgaroñ ne tarāshā hai ik bahāna nayā

jalāyā jā.egā phir koī āshiyāna nayā

vahī hikāyat-e-majbūrī-e-bashar ki jo thī

na koī daam nayā hai na āb-o-dāna nayā

ḳhudā nahīñ ho ḳhudā.ī pe iḳhtiyār to hai

kise majāl ki ab DhūñDhe āstāna nayā

harīf-e-mauja-e-tūfāñ hai merī tishna-labī

koī sune to zarā un se shāḳhsāna nayā

samundaroñ kī ravānī pe dastaras un kī

havā.eñ DhūñDhtī phirtī haiñ ab Thikāna nayā

tumhāre ahd-e-hukūmat meñ kis kī himmat hai

lagā.e fikr ke sahrā meñ shāmiyāna nayā

jo muttahid hoñ to qatre bhī ik samundar haiñ

sunegā kaun magar harf-e-mahramāna nayā

sitamgaron ne tarasha hai ek bahana naya

jalaya jaega phir koi aashiyana naya

wahi hikayat-e-majburi-e-bashar ki jo thi

na koi dam naya hai na aab-o-dana naya

KHuda nahin ho KHudai pe iKHtiyar to hai

kise majal ki ab DhunDhe aastana naya

harif-e-mauja-e-tufan hai meri tishna-labi

koi sune to zara un se shaKHsana naya

samundaron ki rawani pe dastaras un ki

hawaen DhunDhti phirti hain ab Thikana naya

tumhaare ahd-e-hukumat mein kis ki himmat hai

lagae fikr ke sahra mein shamiyana naya

jo muttahid hon to qatre bhi ek samundar hain

sunega kaun magar harf-e-mahramana naya