siyah dard ka ye saeban gir jae

siyāh dard kā ye sā.ebān gir jaa.e

hamīñ pe TuuT ke kaash āsmān gir jaa.e

ḳharāba-e-dil-e-tanhā na dekhā jā.egā

hamīñ makīñ haiñ to ham par makān gir jaa.e

maiñ is laraztī sī dīvār-e-dil kā nauha huuñ

jo kahte kahte koī dāstān gir jaa.e

sambhal sambhal ke uThā bār-e-bekasī kā pahāḌ

tire jigar pe na sar kī chaTān gir jaa.e

na aise lauñg ghumā naak meñ hasīñ muTiyār

jo hal chalāte haiñ koī kisān gir jaa.e

duā-e-nīm-shabī aur yaqīn-e-be-asrī

ki jaise tiir se pahle kamān gir jaa.e

'musavvir' aisī huī tañg ye zamīñ ham par

baḌhīñ jidhar bhī vahīñ āsmān gir jaa.e

siyah dard ka ye saeban gir jae

hamin pe TuT ke kash aasman gir jae

KHaraba-e-dil-e-tanha na dekha jaega

hamin makin hain to hum par makan gir jae

main is larazti si diwar-e-dil ka nauha hun

jo kahte kahte koi dastan gir jae

sambhal sambhal ke uTha bar-e-bekasi ka pahaD

tere jigar pe na sar ki chaTan gir jae

na aise laung ghuma nak mein hasin muTiyar

jo hal chalate hain koi kisan gir jae

dua-e-nim-shabi aur yaqin-e-be-asri

ki jaise tir se pahle kaman gir jae

'musawwir' aisi hui tang ye zamin hum par

baDhin jidhar bhi wahin aasman gir jae