siyah-KHana-e-jaan mein sharar-e-shauq ki hai

siyāh-ḳhāna-e-jāñ meñ sharār-e-shauq kī hai

ye tāzgī ye damak nau-bahār shauq kī hai

tamām zabza-o-dīvār zard hai phir bhī

dabī dabī sī sadā ābshār-e-shauq kī hai

yahī badan se badan kā hai vālihāna kalām

mirī ragoñ meñ jo mastī ḳhumār-e-shauq kī hai

na tund-o-tez havā hai na mauj-e-tūfāñ-ḳhez

yahī to umr miyāñ kārobār-e-shauq kī hai

hai dīdanī dar-o-dīvār aarzū kī chamak

ajiib raushnī sham-e-mazār-e-shauq kī hai

nigāh-e-nāz fusūñ-āfrīñ ko hai ma.alūm

ki nok TuuTī huī dil meñ ḳhār-e-shauq kī hai

yahī hai nuqta-e-āġhāz shahr-e-gul 'ishrat'

isī dayār meñ ḳhushbū dayār-e-shauq kī hai

siyah-KHana-e-jaan mein sharar-e-shauq ki hai

ye tazgi ye damak nau-bahaar shauq ki hai

tamam zabza-o-diwar zard hai phir bhi

dabi dabi si sada aabshaar-e-shauq ki hai

yahi badan se badan ka hai walihana kalam

meri ragon mein jo masti KHumar-e-shauq ki hai

na tund-o-tez hawa hai na mauj-e-tufan-KHez

yahi to umr miyan karobar-e-shauq ki hai

hai didani dar-o-diwar aarzu ki chamak

ajib raushni sham-e-mazar-e-shauq ki hai

nigah-e-naz fusun-afrin ko hai malum

ki nok TuTi hui dil mein KHar-e-shauq ki hai

yahi hai nuqta-e-aghaz shahr-e-gul 'ishrat'

isi dayar mein KHushbu dayar-e-shauq ki hai