siyah-KHana kabhi jalwa-gar sa lagta hai

siyāh-ḳhāna kabhī jalva-gar sā lagtā hai

kaho kahāñ se ye vīrāna ghar sā lagtā hai

ruke hue haiñ usī ''phir mileñge'' par ab tak

kahā zabān kā us kī nazar sā lagtā hai

chhupī hai kab koī bhī baat tum se par phir bhī

vo baat kyā hai ki kahne meñ Dar sā lagtā hai

ye aa.ine meñ mujhe dekhtā hai kaun bhalā

ik arse se jo idhar se udhar sā lagtā hai

jo jāntā hai ki vo jāntā nahīñ kuchh bhī

vo be-ḳhabar hī mujhe bā-ḳhabar sā lagtā hai

hai ḳhvāb-zār shikan-dar-shikan shikanja-bar

pa us meñ naqsh tirā mo'atabar sā lagtā hai

vo aur fasāna-e-kaun-o-makāñ vasī.a lage

maiñ aur qissa ye kuchh muḳhtasar sā lagtā hai

maqām-e-marg kahāñ koī āḳhirī manzil

sire se rāh-e-fanā ke safar sā lagtā hai

kisī tarah use anjām tak nahīñ laatā

tamāshā-sāz zarā be-hunar sā lagtā hai

siyah-KHana kabhi jalwa-gar sa lagta hai

kaho kahan se ye virana ghar sa lagta hai

ruke hue hain usi phir milenge par ab tak

kaha zaban ka us ki nazar sa lagta hai

chhupi hai kab koi bhi baat tum se par phir bhi

wo baat kya hai ki kahne mein Dar sa lagta hai

ye aaine mein mujhe dekhta hai kaun bhala

ek arse se jo idhar se udhar sa lagta hai

jo jaanta hai ki wo jaanta nahin kuchh bhi

wo be-KHabar hi mujhe ba-KHabar sa lagta hai

hai KHwab-zar shikan-dar-shikan shikanja-bar

pa us mein naqsh tera mo'atabar sa lagta hai

wo aur fasana-e-kaun-o-makan wasia lage

main aur qissa ye kuchh muKHtasar sa lagta hai

maqam-e-marg kahan koi aaKHiri manzil

sire se rah-e-fana ke safar sa lagta hai

kisi tarah use anjam tak nahin lata

tamasha-saz zara be-hunar sa lagta hai