siyah raat ke badan pe dagh ban ke rah gae

siyāh raat ke badan pe daaġh ban ke rah ga.e

ham āftāb the magar charāġh ban ke rah ga.e

kisī ko ishq meñ bhī ab junūñ se vāsta nahīñ

ye kyā huā ki saare dil dimāġh ban ke rah ga.e

vo shāḳh shāḳh niile piile laal rañg kyā hue

tamām dasht ke parind zaaġh ban ke rah ga.e

jinheñ ye zo.am thā zamīñ se tishnagī miTā.eñge

ajab huā vahī tahī-ayāġh ban ke rah ga.e

milegā sab ko apnā haq raheñge sab sukūn se

magar vo saare va.ade sabz baaġh ban ke rah ga.e

ujāḌte haiñ roz ham basī-basā.ī bastiyāñ

ḳhushā vo log jo makīn-e-rāġh ban ke rah ga.e

siyah raat ke badan pe dagh ban ke rah gae

hum aaftab the magar charagh ban ke rah gae

kisi ko ishq mein bhi ab junun se wasta nahin

ye kya hua ki sare dil dimagh ban ke rah gae

wo shaKH shaKH nile pile lal rang kya hue

tamam dasht ke parind zagh ban ke rah gae

jinhen ye zoam tha zamin se tishnagi miTaenge

ajab hua wahi tahi-ayagh ban ke rah gae

milega sab ko apna haq rahenge sab sukun se

magar wo sare wade sabz bagh ban ke rah gae

ujaDte hain roz hum basi-basai bastiyan

KHusha wo log jo makin-e-ragh ban ke rah gae