siyah raat se hum raushni banate hain

siyāh raat se ham raushnī banāte haiñ

purānī baat ko aksar na.ī banāte haiñ

kal ek bachche ne ham se kahā banāo ghar

so ham ne kah diyā Thahro abhī banāte haiñ

ham ek aur hī manzar kī taak meñ haiñ miyāñ

ye dhūp-chhāñv ke naqshe sabhī banāte haiñ

musavvirān-e-fanā apne canvas pe kabhī

na koī shahr na koī galī banāte haiñ

ham us dayār meñ zinda haiñ jis ke saare log

kabhī fatīla kabhī lablabī banāte haiñ

siyah raat se hum raushni banate hain

purani baat ko aksar nai banate hain

kal ek bachche ne hum se kaha banao ghar

so hum ne kah diya Thahro abhi banate hain

hum ek aur hi manzar ki tak mein hain miyan

ye dhup-chhanw ke naqshe sabhi banate hain

musawviran-e-fana apne canwas pe kabhi

na koi shahr na koi gali banate hain

hum us dayar mein zinda hain jis ke sare log

kabhi fatila kabhi lablabi banate hain