siyasat jab zarurat ho naya rishta banati hai

siyāsat jab zarūrat ho nayā rishta banātī hai

koī kitnā muḳhālif ho use apnā banātī hai

shanāsā ḳhauf kī tasvīr hai us kī bayāzoñ meñ

mirī beTī hasīñ piñjre meñ ik chiḌiyā banātī hai

taḳhayyul harf meñ Dhal kar ubhar aatā hai kāġhaz par

sarāpā sochtā huuñ maiñ ġhazal chehra banātī hai

kisī par mehrbāñ hotī hai jab bhī daulat-e-duniyā

use sāhab use qibla use kyā kyā banātī hai

haqīqī shā'irī dād-e-suḳhan se bhī huī mahrūm

bilā sar-pair vaalī shā'irī paisa banātī hai

gavārā kab hai mamtā ko mirā yuuñ dhuup meñ chalnā

mirī maañ oḌhnī phailā ke ik chhātā banātī hai

ye achchhā.ī meñ bhī 'sābir' burā.ī DhūñD letī hai

ye duniyā hai alif par bhī kabhī shosha banātī hai

siyasat jab zarurat ho naya rishta banati hai

koi kitna muKHalif ho use apna banati hai

shanasa KHauf ki taswir hai us ki bayazon mein

meri beTi hasin pinjre mein ek chiDiya banati hai

taKHayyul harf mein Dhal kar ubhar aata hai kaghaz par

sarapa sochta hun main ghazal chehra banati hai

kisi par mehrban hoti hai jab bhi daulat-e-duniya

use sahab use qibla use kya kya banati hai

haqiqi sha'iri dad-e-suKHan se bhi hui mahrum

bila sar-pair wali sha'iri paisa banati hai

gawara kab hai mamta ko mera yun dhup mein chalna

meri man oDhni phaila ke ek chhata banati hai

ye achchhai mein bhi 'sabir' burai DhunD leti hai

ye duniya hai alif par bhi kabhi shosha banati hai