soch ka saniya dam bhar ko gaya yar ke pas

soch kā sāniya dam bhar ko gayā yaar ke paas

paañv be-sāḳhta le aa.e mujhe kaar ke paas

ek patthar hai ki bas surḳh huā jaatā hai

koī pahroñ se khaḌā hai kisī dīvār ke paas

ghanTiyāñ shor machātī haiñ mire kānoñ meñ

phone murda hai magar bistar-e-bedār ke paas

kis tarah barf-bharī raat guzārī hogī

maiñ bhī maujūd na thā yār-e-tarah-dār ke paas

ibrat-āmoz hai darbār-e-shab-o-roz kā taaj

tasht-e-tārīḳh meñ sar rakkhe haiñ dastār ke paas

chashm-e-lāla pe siyah paTTiyāñ bāñdhīñ 'mansūr'

sūliyāñ gāḌne vaale gul-o-gulzār ke paas

soch ka saniya dam bhar ko gaya yar ke pas

panw be-saKHta le aae mujhe kar ke pas

ek patthar hai ki bas surKH hua jata hai

koi pahron se khaDa hai kisi diwar ke pas

ghanTiyan shor machati hain mere kanon mein

phone murda hai magar bistar-e-bedar ke pas

kis tarah barf-bhari raat guzari hogi

main bhi maujud na tha yar-e-tarah-dar ke pas

ibrat-amoz hai darbar-e-shab-o-roz ka taj

tasht-e-tariKH mein sar rakkhe hain dastar ke pas

chashm-e-lala pe siyah paTTiyan bandhin 'mansur'

suliyan gaDne wale gul-o-gulzar ke pas