soch ka zahr na ab sham-o-sahar de koi

soch kā zahr na ab shām-o-sahar de koī

aam hai be-ḳhabarī aisī ḳhabar de koī

sair-e-āfāq ho kyuuñ mashġhala-e-fikr-o-nazar

kaash mere par-e-parvāz katar de koī

duur tak bikhrā huā ret kī sūrat hai vajūd

ḳhud ko āvāz idhar de ki udhar de koī

mere alfāz na kar paa.e ma.ānī ko asiir

kitne dariyāoñ ko ik kuuze meñ bhar de koī

munkashif jis se hoñ asrār mirī hastī ke

jaane kab mujh ko vo irfān-o-nazar de koī

soch ka zahr na ab sham-o-sahar de koi

aam hai be-KHabari aisi KHabar de koi

sair-e-afaq ho kyun mashghala-e-fikr-o-nazar

kash mere par-e-parwaz katar de koi

dur tak bikhra hua ret ki surat hai wajud

KHud ko aawaz idhar de ki udhar de koi

mere alfaz na kar pae maani ko asir

kitne dariyaon ko ek kuze mein bhar de koi

munkashif jis se hon asrar meri hasti ke

jaane kab mujh ko wo irfan-o-nazar de koi