soch lije kaf-e-afsos bhi mal sakte hain

soch liije kaf-e-afsos bhī mal sakte haiñ

aap chalne ko mire saath meñ chal sakte haiñ

jāda-e-ishq pe chalnā hai to phir der na kar

sochne se tire jazbāt badal sakte haiñ

shiddat-e-pyās ke ehsās ko baḌhne diije

eḌiyoñ se kabhī chashme bhī ubal sakte haiñ

ik to vaise hī udāsī kī ghaTā chhā.ī hai

aur chheḌoge to aañsū bhī nikal sakte haiñ

aap mazlūm ke ashkoñ se na khilvāḌ kareñ

ye vo dariyā haiñ jo shahroñ ko nigal sakte haiñ

apnī yādoñ ko mire paas na aane diije

varna so.e hue armān machal sakte haiñ

aap aise nazar-andāz hameñ mat kiije

khoTe sikke kabhī bāzār meñ chal sakte haiñ

jin ko dīvāna samajhte haiñ ye duniyā vaale

zid pe aa.eñ to ye taqdīr badal sakte haiñ

raushnī ke liye 'muḳhtār' jalā.e the charāġh

kyā ḳhabar thī ki mire haath bhī jal sakte haiñ

soch lije kaf-e-afsos bhi mal sakte hain

aap chalne ko mere sath mein chal sakte hain

jada-e-ishq pe chalna hai to phir der na kar

sochne se tere jazbaat badal sakte hain

shiddat-e-pyas ke ehsas ko baDhne dije

eDiyon se kabhi chashme bhi ubal sakte hain

ek to waise hi udasi ki ghaTa chhai hai

aur chheDoge to aansu bhi nikal sakte hain

aap mazlum ke ashkon se na khilwaD karen

ye wo dariya hain jo shahron ko nigal sakte hain

apni yaadon ko mere pas na aane dije

warna soe hue arman machal sakte hain

aap aise nazar-andaz hamein mat kije

khoTe sikke kabhi bazar mein chal sakte hain

jin ko diwana samajhte hain ye duniya wale

zid pe aaen to ye taqdir badal sakte hain

raushni ke liye 'muKHtar' jalae the charagh

kya KHabar thi ki mere hath bhi jal sakte hain