soch mein tere suna raat jo khaTka-paTka

soch meñ tere sunā raat jo khaTkā-paTkā

sar ko takiye se uThā paTTī pe de de paTkā

tū ne gar kañghī jo kākul ko pakaḌ kar jhaTkā

dil paḌā phirtā hai sar mārtā bhūlā-bhaTkā

laḳht-e-dil aa sar-e-mizhgāñ pe laTakte haiñ paḌe

terī ulfat ne bhalā saañg dikhāyā naT kā

jab na tab bose pe haTte ho ki dūñgā na kabhī

maan kar ye na mirī jaan phir aisī haT kā

kyuuñ tirī chaal laTak dekh ke dil laTke haiñ

kuchh to ham ko bhī batā kis se ye sīkhā laTkā

naT-khaTī dekh tirī maiñ to achambhe meñ rahā

dil jhapaT haath se jhaT raag sunāyā khaTkā

ghar base bol bhī kuchh kyā hai ḳharābī Thānī

kab talak ham se phiregā yūñhī phaTkā phaTkā

dil-e-gum-gashta kī har ik se maiñ kartā huuñ talāsh

chor jo thā vahī āñkhoñ ko churā kar saTkā

soch mein tere suna raat jo khaTka-paTka

sar ko takiye se uTha paTTi pe de de paTka

tu ne gar kanghi jo kakul ko pakaD kar jhaTka

dil paDa phirta hai sar marta bhula-bhaTka

laKHt-e-dil aa sar-e-mizhgan pe laTakte hain paDe

teri ulfat ne bhala sang dikhaya naT ka

jab na tab bose pe haTte ho ki dunga na kabhi

man kar ye na meri jaan phir aisi haT ka

kyun teri chaal laTak dekh ke dil laTke hain

kuchh to hum ko bhi bata kis se ye sikha laTka

naT-khaTi dekh teri main to achambhe mein raha

dil jhapaT hath se jhaT rag sunaya khaTka

ghar base bol bhi kuchh kya hai KHarabi Thani

kab talak hum se phirega yunhi phaTka phaTka

dil-e-gum-gashta ki har ek se main karta hun talash

chor jo tha wahi aankhon ko chura kar saTka