soch raha hai itna kyun ai dast-e-be-taKHir nikal

soch rahā hai itnā kyuuñ ai dast-e-be-tāḳhīr nikāl

tū ne apne tarkash meñ jo rakkhā hai vo tiir nikāl

jis kā kuchh anjām nahīñ vo jañg hai do naqqādoñ kī

lafzoñ kī saffāk sināneñ lahjoñ kī shamshīr nikāl

āshob-e-taḳhrīb sā kuchh is andām-e-taḳhlīq meñ hai

toḌ mire dīvār-o-dar ko ek na.ī ta.amīr nikāl

chāñd sitāroñ kī khetī kar raat kī banjar dhartī par

aañkh ke is sūkhe dariyā se ḳhvāboñ kī ta.abīr nikāl

tere is ehsān se merī ġhairat kā dam ghuTtā hai

mere in pairoñ se apnī shohrat kī zanjīr nikāl

roz kī āpā-dhāpī se kuchh vaqt churā kar laa.e haiñ

yaar zarā ham donoñ kī ik achchhī sī tasvīr nikāl

'shāhid' ab ye aalam hai is ahd-e-suḳhan-arzānī kā

'mīr' pe kar īrād bhī us pe 'ġhālib' kī tafsīr nikāl

soch raha hai itna kyun ai dast-e-be-taKHir nikal

tu ne apne tarkash mein jo rakkha hai wo tir nikal

jis ka kuchh anjam nahin wo jang hai do naqqadon ki

lafzon ki saffak sinanen lahjon ki shamshir nikal

aashob-e-taKHrib sa kuchh is andam-e-taKHliq mein hai

toD mere diwar-o-dar ko ek nai tamir nikal

chand sitaron ki kheti kar raat ki banjar dharti par

aankh ke is sukhe dariya se KHwabon ki tabir nikal

tere is ehsan se meri ghairat ka dam ghuTta hai

mere in pairon se apni shohrat ki zanjir nikal

roz ki aapa-dhapi se kuchh waqt chura kar lae hain

yar zara hum donon ki ek achchhi si taswir nikal

'shahid' ab ye aalam hai is ahd-e-suKHan-arzani ka

'mir' pe kar irad bhi us pe 'ghaalib' ki tafsir nikal