socha tha gulshan ki fazaen hongi naghma-bar bahut

sochā thā gulshan kī fazā.eñ hoñgī naġhma-bār bahut

lekin jab dekhā to chaman meñ phuul the kam aur ḳhaar bahut

aane vaale aa bhī jā ye shaam hī shām-e-zīst na ho

aaj sahar se badlā huā hai rang-e-ruḳh-e-bīmār bahut

aise shā.ir aise rahbar aaj ziyāda haiñ jin meñ

azm-e-salīb-o-dār nadārad zikr-e-salīb-o-dār bahut

raat sar-e-mai-ḳhāna ham se kaj-rau nāseh uljhe the

ham hī kuchh chup ho ga.e varna baḌh jaatī takrār bahut

azm agar ho mustahkam to phir dasht-o-jabal kuchh chiiz nahīñ

nā-puḳhta ho azm-o-amal to ret kī bhī dīvār bahut

as.hāb-e-fikr-o-fan DhūñDo to daur-e-nau meñ kitne kam

da.avā-e-fan meñ yuuñ dekho to bātūnī fan-kār bahut

aaj mujhe tum kuchh bhī samjho lekin yaaro yaad rakho

ik din tum hī yaad karoge merā ḳhulūs aur pyaar bahut

yuuñ dekho to rāhbaroñ meñ kaise muḳhlis hote log

saath chalo to sābit hoñge muḳhlis kam ayyār bahut

vaqt paḌā jab ham par 'hairat' dukh kā saath koī na thā

yuuñ milte the qadam qadam par hamdard aur ġham-ḳhvār bahut

socha tha gulshan ki fazaen hongi naghma-bar bahut

lekin jab dekha to chaman mein phul the kam aur KHar bahut

aane wale aa bhi ja ye sham hi sham-e-zist na ho

aaj sahar se badla hua hai rang-e-ruKH-e-bimar bahut

aise shair aise rahbar aaj ziyaada hain jin mein

azm-e-salib-o-dar nadarad zikr-e-salib-o-dar bahut

raat sar-e-mai-KHana hum se kaj-rau naseh uljhe the

hum hi kuchh chup ho gae warna baDh jati takrar bahut

azm agar ho mustahkam to phir dasht-o-jabal kuchh chiz nahin

na-puKHta ho azm-o-amal to ret ki bhi diwar bahut

ashab-e-fikr-o-fan DhunDo to daur-e-nau mein kitne kam

dawa-e-fan mein yun dekho to baatuni fan-kar bahut

aaj mujhe tum kuchh bhi samjho lekin yaro yaad rakho

ek din tum hi yaad karoge mera KHulus aur pyar bahut

yun dekho to rahbaron mein kaise muKHlis hote log

sath chalo to sabit honge muKHlis kam ayyar bahut

waqt paDa jab hum par 'hairat' dukh ka sath koi na tha

yun milte the qadam qadam par hamdard aur gham-KHwar bahut