sochta hun ki use nind bhi aati hogi

sochtā huuñ ki use niiñd bhī aatī hogī

yā mirī tarah faqat ashk bahātī hogī

vo mirī shakl mirā naam bhulāne vaalī

apnī tasvīr se kyā aañkh milātī hogī

is zamīñ par bhī hai sailāb mire ashkoñ se

mere mātam kī sadā arsh hilātī hogī

shaam hote hī vo chaukhaT pe jalā kar sham.eñ

apnī palkoñ pe ka.ī ḳhvāb sulātī hogī

us ne silvā bhī liye hoñge siyah-rañg libās

ab moharram kī tarah iid manātī hogī

mere tārīk zamānoñ se nikalne vaalī

raushnī tujh ko mirī yaad dilātī hogī

ruup de kar mujhe is meñ kisī shahzāde kā

apne bachchoñ ko kahānī vo sunātī hogī

sochta hun ki use nind bhi aati hogi

ya meri tarah faqat ashk bahati hogi

wo meri shakl mera nam bhulane wali

apni taswir se kya aankh milati hogi

is zamin par bhi hai sailab mere ashkon se

mere matam ki sada arsh hilati hogi

sham hote hi wo chaukhaT pe jala kar shamen

apni palkon pe kai KHwab sulati hogi

us ne silwa bhi liye honge siyah-rang libas

ab moharram ki tarah id manati hogi

mere tarik zamanon se nikalne wali

raushni tujh ko meri yaad dilati hogi

rup de kar mujhe is mein kisi shahzade ka

apne bachchon ko kahani wo sunati hogi