sochte aur jagte sanson ka ek dariya hun main

sochte aur jāgte sāñsoñ kā ik dariyā huuñ maiñ

apne gum-gashta kināroñ ke liye bahtā huuñ maiñ

besh-qīmat huuñ mirī qīmat lagā saktā hai kaun

tere kūche meñ bikūñ to phir bahut sastā huuñ maiñ

ḳhvāb jo dekhe the maiñ ne vo bhī ab dhundlā ga.e

ab to tum aa jaao sāhab ab bahut tanhā huuñ maiñ

jal gayā saarā badan in mausamoñ kī aag meñ

ek mausam ruuh hai jis meñ ki ab zinda huuñ maiñ

mere hoñToñ kā tabassum de gayā dhokā tujhe

tū ne mujh ko baaġh jaanā dekh le sahrā huuñ maiñ

maiñ to yaaro aap apnī jaan kā dushman huā

zahr ban ke aap apnī ruuh meñ utrā huuñ maiñ

dekhne merī pazīrā.ī ko ab aatā hai kaun

lamha bhar ko vaqt kī dahlīz par aayā huuñ maiñ

tū ne be-dekhe guzar kar mujh ko patthar kar diyā

tū palaT kar dekh le to aaj bhī hiirā huuñ maiñ

lafz gūñge haiñ inheñ goyā.ī dene ke liye

zindagī ke sachche lamhoñ meñ ġhazal kahtā huuñ maiñ

sochte aur jagte sanson ka ek dariya hun main

apne gum-gashta kinaron ke liye bahta hun main

besh-qimat hun meri qimat laga sakta hai kaun

tere kuche mein bikun to phir bahut sasta hun main

KHwab jo dekhe the main ne wo bhi ab dhundla gae

ab to tum aa jao sahab ab bahut tanha hun main

jal gaya sara badan in mausamon ki aag mein

ek mausam ruh hai jis mein ki ab zinda hun main

mere honTon ka tabassum de gaya dhoka tujhe

tu ne mujh ko bagh jaana dekh le sahra hun main

main to yaro aap apni jaan ka dushman hua

zahr ban ke aap apni ruh mein utra hun main

dekhne meri pazirai ko ab aata hai kaun

lamha bhar ko waqt ki dahliz par aaya hun main

tu ne be-dekhe guzar kar mujh ko patthar kar diya

tu palaT kar dekh le to aaj bhi hira hun main

lafz gunge hain inhen goyai dene ke liye

zindagi ke sachche lamhon mein ghazal kahta hun main