sochte kya hain chhalakta jam le kar

sochte kyā haiñ chhalaktā jaam le kar

pīji.e us bevafā kā naam le kar

aa.e the to haath ḳhālī the hamāre

jā rahe haiñ saiñkaḌoñ ilzām le kar

ik diyā ghar meñ jalāyā thā use bhī

le gayā koī tumhārā naam le kar

dhuup aa saktī thī vo aatī nahīñ hai

kaun aa.egā yahāñ paiġhām le kar

kaaT liiñ darbār ne sab kī zabāneñ

bulbuleñ ḳhāmosh haiñ in.aam le kar

kaun sī gañgā nahāyā hai ye sūraj

jab bhī aayā hai to qatl-e-ām le kar

ab nahīñ koī zarūrat ham-safar kī

chal paḌā huuñ gardish-e-ayyām le kar

āshiyāñ hotā to hotā lauTnā bhī

kyā kare 'panchhī' avadh kī shaam le kar

sochte kya hain chhalakta jam le kar

pijie us bewafa ka nam le kar

aae the to hath KHali the hamare

ja rahe hain sainkaDon ilzam le kar

ek diya ghar mein jalaya tha use bhi

le gaya koi tumhaara nam le kar

dhup aa sakti thi wo aati nahin hai

kaun aaega yahan paigham le kar

kaT lin darbar ne sab ki zabanen

bulbulen KHamosh hain inam le kar

kaun si ganga nahaya hai ye suraj

jab bhi aaya hai to qatl-e-am le kar

ab nahin koi zarurat ham-safar ki

chal paDa hun gardish-e-ayyam le kar

aashiyan hota to hota lauTna bhi

kya kare 'panchhi' awadh ki sham le kar