sohbat-e-ghair mun jaya na karo

sohbat-e-ġhair muuñ jaayā na karo

dard-mandāñ kuuñ kuḌhāyā na karo

haq-parastī kā agar daavā hai

be-gunāhāñ kuuñ satāyā na karo

apnī ḳhūbī ke agar tālib ho

apne tālib kuuñ jalāyā na karo

hai agar ḳhātir-e-ushshāq aziiz

ġhair kuuñ dars dikhāyā na karo

mujh ko turshī kā hai parhez sanam

chīn-e-abrū kuuñ dikhāyā na karo

dil kuuñ hotī hai sajan betābī

zulf kuuñ haath lagāyā na karo

nigah-e-talḳh suuñ apnī zālim

zahr kā jaam pilāyā na karo

ham kuuñ bardāsht nahīñ ġhusse kī

be-sabab ġhusse meñ aayā na karo

pāk-bāzāñ meñ hai mash.hūr 'valī'

us suuñ chehre kuuñ chhupāyā na karo

sohbat-e-ghair mun jaya na karo

dard-mandan kun kuDhaya na karo

haq-parasti ka agar dawa hai

be-gunahan kun sataya na karo

apni KHubi ke agar talib ho

apne talib kun jalaya na karo

hai agar KHatir-e-ushshaq aziz

ghair kun dars dikhaya na karo

mujh ko turshi ka hai parhez sanam

chin-e-abru kun dikhaya na karo

dil kun hoti hai sajan betabi

zulf kun hath lagaya na karo

nigah-e-talKH sun apni zalim

zahr ka jam pilaya na karo

hum kun bardasht nahin ghusse ki

be-sabab ghusse mein aaya na karo

pak-bazan mein hai mashhur 'wali'

us sun chehre kun chhupaya na karo